शिरूर तालुका प्रतिनिधी : शकील मनियार
मांडवगण फराटा ( ता.शिरूर ) येथील दगडवाडी रोड,गोकुळनगर येथे रात्रीच्या अंधारात आईच्या मागे धावत असलेला ७ वर्षीय लहान बालकावर बिबट्याने हल्ला करून मातेच्या डोळ्यादेखत उसाच्या शेतात फरफटत नेले. यात गंभीर जखमी झालेल्या त्या निरागस बालकाचा दुर्दैवी मृत्यू झाल्याने परिसरात हळहळ व्यक्त केली जात आहे.वन्स राजकुमार सिंग ( वय.७ वर्षे ) असे मृत्युमुखी पडलेल्या चिमुकल्याचे नाव आहे.
मांडवगण फराटा येथील दगडवाडी रोड, गोकुळनगर येथे संदीप अशोक घाडगे यांचे रस्त्याच्या कडेला उसाचे गुऱ्हाळ आहे. या गुऱ्हाळावर राजकुमार नथू सिंग हे कुटुंबासमवेत कामाला आहेत.राजकुमार सिंग व त्यांची पत्नी रेखा यांच्यात शुक्रवारी रात्री घरी असतानाच घरगुती कारणावरून किरकोळ वाद सुरू होता.त्या दरम्यान पुढे चालत असलेल्या आईच्या मागून त्यांचा वन्स हा मुलगा चालत होता.अशातच मोठ्याने रडण्याचा आवाज आल्याने आईने मागे वळून पाहिले असता मातेला बिबट्याने आपल्या पोटच्या लेकरावर हल्ला करून शेजारील उसाच्या शेतात नेताना पाहिले.हे भयानक दृष्य पाहून मातेने मोठ्याने आरड़ाओरडा केला.यावेळी तेथे जवळच असलेले गु-हाळ कामगार,उसतोड कामगार व उपस्थित असणा-यांनी उसात बालकाचा शोध घेण्याचा प्रयत्न सुरु केला.दरम्यान पोलिस व वनविभागाला या घटनेची माहिती कळविण्यात आली.तर राञी उशिरा चिमुकला गंभीर जखमी अवस्थेत मिळून आल्याने त्याला तात्काळ दवाखान्यात उपचारांसाठी नेण्यात आले.मात्र उपचारापूर्वीच मुलाचा मृत्यू झाल्याचे डॉक्टरांनी सांगितले.घटनेची माहिती मिळताच घटनास्थळी वनविभागाच्या अधिकाऱ्यांनी भेटी दिल्या असून सदरील बिबट्याला पकडण्यासाठी परिसरात पिंजरे लावले आहेत.तसेच घटनास्थळी मोठ्या प्रमाणावर वनविभागाचे कर्मचारी लक्ष ठेवून असून ठिकठिकाणी सीसीटिव्ही कॅमेरे देखील लावण्यात आले आहेत.