**शिरूर तालुका प्रतिनिधी : शकील मनियार
जि.प.शाळा पिंपरी दुमाला येथील शिक्षक राहूल चातुर व कांताराम शिंदे यांचे कार्य कौतुकास्पद व प्रेरणादायी असल्याचे मत जिल्हा परिषद पुणे आदर्श सरपंच पुरस्कार प्राप्त पिंपरी दुमाला येथील माजी सरपंच गायत्री चिखले यांनी व्यक्त केले.
नवरात्र उत्सवाचे औचित्य साधून सोहम टॅलेंटलिंक प्रा. लि. व वसुंधरा महिला बचत गट यांच्यावतीने पिंपरी दुमाला येथील शिक्षकांचा सन्मान करण्यात आला. महाराष्ट्र शासनाच्या शैक्षणिक व्हिडिओ निर्मिती स्पर्धेमध्ये कांताराम शिंदे यांनी तीन विभागांमध्ये तालुक्यात प्रथम क्रमांक प्राप्त केला आहे, त्याचप्रमाणे विविध तंत्रज्ञान विषयक स्पर्धांमध्ये सहभागी होऊन यश मिळवले आहे.मुख्याध्यापक राहुल चातुर यांनी शालेय विकासासोबत विविध सामाजिक,शैक्षणिक व स्वयंसेवी संस्थांसोबत काम करून समाजामध्ये एक नवीन आदर्श निर्माण केला आहे. या सर्व बाबींची दखल घेऊन सोहम टॅलेंटलिंक प्रा.लि. यांनी हा कार्यक्रम आयोजित केला होता.
याप्रसंगी स्वयंसेवी शिक्षिका शोभा डोळस, पोषण आहार कर्मचारी कौशल्या चिखले यांच्या कार्याचे कौतुक करून वसुंधरा बचत गटाच्या संयोजिका रूपाली चिखले यांच्या हस्ते त्यांना सन्मानित करण्यात आले. या कार्यक्रमाबद्दल तंत्रस्नेही शिक्षक कांताराम शिंदे यांनी दोन्ही संस्थांचे आभार मानले.